Luk 18 | GAM | STEP | Jisas kogoye una kamang ege ege yene, kogke nayene dje pille kandja buko ta dji. Une embe dji,

Luke 18

Ana kangill ta iwa jas boll kandja yembe ye dji

1 Jisas kogoye una kamang ege ege yene, kogke nayene dje pille kandja buko ta dji. Une embe dji, 2 dumo ta yei al iwa jas ta moi. Une God kand nagolo, una kane wopake ye nawo embe ye moi. 3 Dumo yei al ge ana kangill ta moi. Une ege ege wo jas moi al embe dji, iwa ta wo na kot ye aundo, ni na amblo pille dje aumben we dji. 4 Ana kandja embe dje molo pika jas ge man dji, amblo pille dje nawi. Ba alla are une embe dji, nanam God kand nagoro, una mor ge na para wandillne nagoro ba, 5 ana kangill ge ege ege wo na moro al imb aundo pille na amblo pille dje auno, man panda, une nipnapa dje pa moyaka na kaima ke piyo we dji.

6 Jisas kandja embe dje kere embe dji, jas moi ge une iwa ke mal moi ba, une dji mal ge ye pillme! 7 God yene dje i unakye mor ge, imina armina ege ege, ni no amblo pille dje aumben we djine ge, une ola dje amblo pille dje aunda mo naunda? Na kandja dje ye aundo, une ola dje wo una ge amblo pille dje aunda. Ba Una Wombe are yem wonda kune ge une wal naral wal kanda? Makimb al mor una ge pillgi djine mo?

Parisi una ne, ku takis i una Jisas kandja buko dji

9 Una pende no nomane wopake pai mormon, una pende mor ge ke mal mor dje kani una kambono pende moi al ge, Jisas kandja buko ta dje awo embe dji, 10 iwa soka lotu numb kerman yei al kamang yemboll dje pupill. 11 Pupill ge, iwa ta moi ge Parisi iwa moi. Iwa ta ge ku takis i una moi. Parisi iwa ge aglo molo yene nomane pai mal pille, yene kandjiye amblo pla woro kamang embe yei, God, na ni wopake we dje aundo. Una porapora singare yenj mal ge na embe nayendo. Kambono kunumb no, singare ke ye, iwana boll kunumb nonj. Alla ku takis i una manda molo yendo mal ge na embe nayendo, man. 12 Ege ege waka taimane dje yero poke ge, na ni pille ege kune soka kwa mapill ye nanondo. Wal 10-pela dje kane nondo ge na taimane dje i ni awo embe yendo we dji.

13 Parisi iwa ge kandja embe dji ba, ku takis i iwa ge ellke molo na kane pla kupill al worno ge kune nayendo dje pille, yene gone al to, kamang embe yei, God, na singare ke yendo una moro. Ni na wandill golo awe! dji. 14 Jisas embe dji, na kandja dje ye aundo, ku takis i iwa ge er numbiye al pi ge, yene singare ke ye wani ge God kere awi, une kiwa molo er pi. Ba Parisi iwa yene kandjiye amblo pla woro embe yei ge man.

Ge pille, una ta ye molo iwa kerman mopon dje yei dal, God amblo kal worda ba, una ta yenekne amblo kal wori dal, God amblo pla woro aunda we dji.

Una womba kembis dje i er Jisas moi al woi

(Matyu 19.13-15 ne, Mak 10.13-16)

15 Una womba kembis dje i Jisas moi al woi. Une abiya dje pille iwi ba Jisas kogoye una man dji, ye womba naiwme! dji. 16 Ba Jisas womba iune dje pille embe dji, ye man nadjime! God dumoye kantau yendo al ge womba embe mal mor ge kantau yendo. Womba iwinj ge dje i na moro al wonembe! 17 Na kandja kaima dje ye aundo, womba er God dumoye kantau yendo al er pakna pinj mal una embe nayei dal, kaima er pakna napine, man we dji.

Iwa Kerman ta kog mogoi merke kane noi

(Matyu 19.16-30 ne, Mak 10.17-31)

18 Juda iwa kerman ta moi ge Jisas moi al po embe dji, ni tisa wopake wonden. Na singare namba mal yenaka God na i gun worda na gun eri molo pa moyo ne? dji. 19 Jisas embe dji, ni namba yei pille na wopake wonden we djinden? God taimane ge wopake moro. 20 Mosis lo dje bolo pagi mal ge ni kanden. Iwana boll djingjang nayeme! Una to nagolme! Kunumb nanome! Kot kende dje una naume! Ye nane mane kandja djine mal ye pille kane yeme! dji we dji.

21 Iwa ge embe dji, tisa, na asa womba kembis molo woll ipon moro ge, lo porapora ni djinden ge na yell we dji. 22 Djika Jisas pille une moi al embe dji, ni wal porapora yen ba, wal taimane ta nayenden. Ni kogmogoi kane non moro ge porapora ipo ku bolo i una wal kane nanonj una mor al ge awe! Embe yen dal, ni wal wopake kupill al yenda imben. Alla, ni na boll aike er womben we dji.

23 Jisas kandja embe dji ba alla, iwa ge wal merke kane noi. Une nomane urup kerman dji. 24 Urup djika Jisas kane embe dji, una wal merke kane nonj ge, God dumoye kantau yendo al er pakna pine ba kogo kerman paro; napine mal mor. 25 Kog kamel er wopa kond kembis yero al pakna punda kune nayenda mal embe, una wal merke kane nonj una er God dumoye kantau yendo al pakna pine kune nayendo we dji.

26 Djika yene kogoye una embe dji, ni djinden ge, God nono i yem naworda mal mormon we dji. 27 Jisas embe dji, una mor ge wal yene kune nayendo mal ge, God yenda kune yendo we dji. 28 Djika Pita embe dji, no nonekne numb gull kere, er ni boll wopin we dji. 29 Jisas embe dji, na kandja kaima dje ye aundo, una porapora God dumoye kantau yendo al kogo ge yembon dje pille, yenekne numbine gullne kere, gamene wombane kere, agane mo, nane mane ne, ga kambono ge keri dal, 30 ga makimb al moye kune ge God wal merkeke plato awo yem woro aunda. Alla, ege are wonda ge une ye wordaka gun molo pa moye we dji.

Jisas nanam to goye we dje kune soka asamoll dji ge kandja alla dji

(Matyu 20.17-19 ne, Mak 10.32-34)

31 Jisas kogoye una 12-pela dje i andike woro embe dji, ye pillme! Asa propet kambono kandja porapora pepa bolo Una Wombe to goye we dji mal ge, nono er Jerusalem bonka ge kaima panda. 32 Una ye molo Una Wombe i epil djell una auneke, kambono bakalo awo, ye ke ye awo, kungo to, 33 ka pirgangill to kere to goye. Ege sokara er wo pundaka, une aglo er wo gun punda we dji. 34 Jisas kandja embe dji ba, kogoye una pillpol natoi. Une kandja embe dji ge seke pai, pille ine napai.

Iwa ta nale emill ye pai ge Jisas amblo au dje awi

(Matyu 20.29-34 ne, Mak 10.46-52)

35 Jisas er dumo Jeriko manda puno dje yeika, una ta nale emill yei iwa kondwe djeke ami dje molo wal kokane dje moi. 36 Una merke wo pumaka une pille embe dji, namba yei pille ye una merke wo er po mor ne? dji. 37 Una embe dji, dumo Nasaret iwa Jisas ge wo pundo we dji. 38 Djimaka une yau to embe dji, Jisas, iwa Depit wariye wonden ge, ni na wandill golo awe! dji. 39 Una wekle pi una kandja awo embe dji, ni kandja kere! dji. Ba une yau kerman ke to embe dji, Jisas, iwa Depit wariye wonden ge ni na wandill golo awe! dji.

40 Djika Jisas aglo molo embe dji, ye djineke une ge wondambe! dji. Une manda woika 41 Jisas embe dji, na ni namba mal ye auno dje pren ne? dji. Nale emill yei iwa ge embe dji, Iwa Kerman, na nalena alla au djinda kanno we dji. 42 Jisas embe dji, kune, ni pillgi djin pille, ni nalen alla au djinda kanben we dji. 43 Kandja embe djika une nale al ola dje au dji. Djika une God kandjiye amblo pla worika, Jisas boll aike er pupill. Una porapora moi ge kane God kandjiye amblo pla woro awi.